Há já algum tempo que se fala na Galiza de “Feísmo Urbanístico”; a Wikipédia refere como “o desleixo generalizado que impera em boa parte das construçons do país e que se fai especialmente patente no meio rural e naquelas zonas que sofrem os estragos da especulaçom urbanística”. Mas o desleixo, que chegou também à língua, fai com que hoje o Feísmo Lingüístico esteja especialmente presente no meio urbano e naquelas zonas que sofrem os estragos da pressom do castelhano. Com este concurso a Gentalha pretende evidenciar o estado de degradaçom em que se encontra o galego, muitas vezes tam hibridizado que já nem se identifica com a língua própria. “Alquila-se”, “temos pulpo”, “bizcochos e moletes”, “calamares da ria”, “ciruelas do país”. A nossa língua poderá deixar de existir porque a sua comunidade de falantes decida deixar de falá-la; mas também poderá diluir-se num castelhano que cada dia parece gozar de mais vantagem dentro do próprio galego. Denunciemos, desde a preocupaçom e o respeito, o que está a acontecer. Nom é a nossa intençom ridiculizar, rir ou insultar ninguém, e muito menos aquelas pessoas que se esforçam, apesar das dificuldades, em manter o galego na sua comunicaçom externa. Somos conscientes da falta de modelos e de recursos, da qual nós somos a primeiras vítimas e portanto também co-responsáveis neste feísmo. Só queremos fotografar umha realidade que, do nosso ponto de vista, deve ser invertida se nom queremos desaparecer como comunidade linguística.  

1. As fotografias deverám retratar o processo de hibridaçom que está a sofrer a nossa língua.
2. O prémio será outorgado àquelas fotografias que, a juízo do júri e do público, reflitam melhor e com maior qualidade este processo lingüístico.
3. As fotografias poderám ser enviadas em qualquer formato digital com um máximo de 5 Mb.
4. As fotomontagens nom serám aceites. Permitirám-se correçons mínimas de cor e brilho.
5. As imagens apresentadas passarám a fazer parte dum arquivo criado para uso da Gentalha do Pichel, e poderám ser utilizadas, divulgadas ou reproduzidas pola associaçom citando a autoria das mesmas (salvo mençom expressa a contrário).
6. Deverá indicar-se a localidade e local onde foi tirada a fotografia, a fim de poder comprovar a sua existência real.
7. Cada fotografia terá de ser enviada com um pseudónimo diferente.
8. As fotografias serám enviadas ao e-mail feismolinguistico@gmail.com em anexo. O nome do arquivo será o pseudónimo escolhido.
9. Com o propósito de nom incorrer injustamente no escárnio público, poderám ser apagadas das fotografias quaisquer referências explícitas ao local (privado) onde fôrom tiradas. Nom é intençom deste concurso magoar nem fazer burla.
10. O prazo de entrega de fotografias termina na segunda feira 6 de janeiro de 2014 às 22h00.
11. As fotografias ganhadoras serám escolhidas por votaçom popular e votaçom de júri especializado respetivamente. O período para a votaçom popular decorrerá entre o dia 10 e 30 de janeiro de 2014 no C.S O Pichel.
12. O prémio do público consistirá num lote de produtos da Gentalha e um voto para a eleiçom do júri. O prémio do júri, por sua vez, consistirá num vale de 100€ em diferentes estabelecimentos do Projeto Pontos.
13. Os prémios serám anunciados no dia 31 de janeiro e estarám à disposiçom das pessoas ganhadoras a partir desse mesmo dia no C.S O Pichel.

Exposiçom das fotografias recebidas no C.S O Pichel de 10 a 30 de janeiro

envios a: feismolinguistico@gmail.com

feismolinguistico.wordpress.com