Recebemos com estupor o recente comunicado de Adega no que informa de que a Junta de Galiza tem intençom de pôr fim à colaboraçom institucional com o conhecido Proxecto Ríos que a entidade ecologista galega leva quase 20 anos desenvolvendo por todo o país.
Umha iniciativa que mobilizou milhares de voluntárias para conhecer, limpar e custodiar os rios galegos e que desenvolve um valiosíssimo labor educativo tanto coa comunidade escolar como co resto da sociedade.
De facto, a Gentalha do Pichel leva anos participando na jornada de Limpeza simultánea com as companheiras de Adega assim como contando com elas para realizar saídas formativas de diversa índole.
Custa-nos entender as causas que levam o governo da Junta a retirar o apoio económico a um projeto com tanta implantaçom e utilidade para o país nom sendo que se trate dum castigo pola defesa ativa que Adega fai do meio, muitas vezes pondo paus nas rodas às práticas espoliadoras avaladas polo governo de Rueda.
Por isso, da Gentalha do Pichel queremos mostrar a nossa solidariedade com Adega e denunciar a arbitrariedade dumha medida que semelha mais um castigo do que umha decisom em base a critérios objetivos.
Como entidade autogerida sabemos das dificuldades de desenvolver projetos à margem de qualquer apoio das instituiçons e mesmo com empecilhos por parte destas mas também sabemos que é possível.
Aqui estaremos para ajudar a que o Proxecto Ríos some muitos anos mais!
