A Festa do 17 está a chegar. A semente que plantamos há já vinte anos é agora umha árvore, de polas que se estendem a muitos recunchos desta cidade, e que floresce na primavera.
Cumprir duas décadas como centro social é um orgulho que partilhamos todas as que dumha maneira ou outra fazemos parte da Gentalha do Pichel. Mas neste País também significa e significou um caminho cheio de pedras e obstáculos postos polos mesmos que tenhem entre as suas funçons a defesa dos nossos interesses.
Frente a sua tirania, erguemo-nos contentes e sabedoras de estarmos a sofrer as consequências dum trabalho político e cultural comprometido, que ocupa o lugar que as instituiçons nom som quem de ocupar, nem o aguardamos. Porque consideramos o ativismo como um exercício de poder popular, necessariamente transformador. Somos conscientes de estarmos em tempos difíceis, no meio dumha ofensiva individualista, desumanizadora e consumista, que entorpece ainda mais o nosso agir. Mas a confiança na capacidade coletiva frente a individual nom é umha questom de fé, mas de certeza empírica. Sabemos que um povo organizado, perseverante e comprometido com o seu futuro é umha arma infalível.
A comisom organizadora do 17 leva a trabalhar vários meses arreu. Desde há semanas estám-se a realizar atividades arredor da Festa do 17, com o objetivo de reunir dinheiro e forças para levar adiante um evento de dous dias, com programaçom desde a manhá até a noite. A que se prepara é umha fórmula completa e ambiciosa, especialmente pensada para celebrar as duas décadas da Gentalha; por isso, a quantidade de recursos que é preciso mobilizar é muito importante. O esforço nestas datas sempre é grande, mas nesta ediçom duplica-se, e também se duplicam as necessidades: mais gente a fazer turmas no balcom, no posto de merchan, nas colagens de cartazes nos dias prévios, etc., todo isto para fazer viável a festa.
E sabemos que o vamos conseguir. Somos um espaço vivo, composto de muitas sócias, de alunado dos cursos, de simpatizantes, de coletivos acolhidos, de colaboradoras, de integrantes das comisons. As integrantes deste centro social!
Se queredes bota umha mãozinha escreve a gentalha@gentalha.org
20 anos movendo a língua! Somos Gentalha